حاجات غريبه بس كلنا بنعملها

ليه لما تكون بطاريه الريموت ضعيفه بندوس علي الزراير جامد اوي ونقعد ندوس بغل كده ونضرب الريموت كده يعني هايشتغل؟؟ ولا انت بتعذب الريموت وخلاص؟!!

ليه لو قرصتنا نمله صغيره ونيجي نموتها بنفعصها جااامد اوي انت كده بتنتقم يعني ولا ايه دي نمله يا معلم بتموت بلمسه صغيره ده انت ناقص تضربها بالنار

ليه لما تكون راكب عربيه وماشي في مكان وتحس انك دخلت في مكان غلط او توهت بتوطي صوت الكاسيت كده يعني انت هاتوصل ؟؟
حاجه غريبه اوي

ليه بنقول دايما هديه مجانيه ماطبعا لازم تكون الهديه مجانيه
هو في هديه مش مجانيه

ليه لما يكون مكتوب مثلا علي حيطه كلمه احترس من الدهان .. مابنصدقش ولازم نجرب بادينا
ده هطل يعني ولا الراجل لازم يكتبلنا والنبي لتحترس من الدهان

ليه لما نكون مستنيين الاسانسير ويتأخر بنقعد ندوس كتير اوي علي الزرار كده يعني هايتكسف وينزل بسرعه ؟؟

ليه لما تكون بتأكل طفل صغير بتفتح بقك انت كمان يعني انت اللي هتاكل ولا هو ولا انت بتشجعه يعني

ليه دايما كل مابنصحي من النوم بنحس اننا في حااااجه اضافيه ل 10 دقايق من النوم ولو مانمتهومش بتحس انك هاتموت ولا هايجرالك حاجه

ليه لما تدخل علي حد اوضته وتلاقيه علي سريره وبيتغطي تقوم انت بكل عبط تقوله انت هتنام ؟؟
امال يعني هو هايتشقلب؟؟ ماهو كده واخد وضع النوم حاجه تغيظ بجد

ليه بعد ما نشرب اخر شويه شاي في الكوبايه نبص في الكوبايه مش مصدق يعني ان الشاي خلص ولا انت مخون الكوبايه وبتتأكد ؟؟

ليه لما تكون قاعد في مكان عام وتسمع موبايل بيرن تقوم تشوف اذا كان موبايلك ده اللي بيرن ولا لأ
ليه سعتك يعني هو مافيش إلا انت معاك موبايل

ليه لما نكون بنلعب بلاي ستيشن لعبه عربيات بالذات بنقعد نروح ونيجي كده مع العربيه ونطلع وننزل ونحووووود جااامد مع العربيه كده
ـٌـًـٌـًـٌـًـٌـًـٌـً...ـٌـًـٌـًـٌـًـٌـًـٌـً...ـٌـًـٌـًـٌـًـٌـًـٌـً
يارب الموضوع يعجبكم